04-02-2021, 03:23 AM | #127 |
|
رد: لِيتْ الشّوَارعْ تِجْمعْ اثْنِينْ صُدفَهْ
ياقرادة الحظ
اليوم امي الله يحفظها ارسلتني ايكيا اخذلها غرض البدايه عند رجل الامن اشوف توكلنا لو سمحت اوك حبيبنا هاك .. اوك حياك الله تفضل بسم الله تفضلنا ويادوب دخلت ويتعكرف ذاك الورع الا هو منطرح بين رجولي ويالله يالله بتفاداه لا اطيح فوقه والا اتوطاه برجولي قشعت في امه مع كتفها يالله بداية خير . واتل الورع مع يده اقومه واعتذر والام فطست ضحك وتعتذر بعد هي .🙁 يلا الحمدلله ماصار شي .. وواصلت طريقي عاد تعرفون ايكيا عليهم حلفه الا يلففوك كل الاقسام من ورا خشمك وحسب المسار اللي حاطينه وادرعم مع العالم ذي .. 😁 وانا بقسم طاولات الطعام ويجيني ذاك المتعافي بظهره قاعد يصور ويرجع لورا عشان ياخذ المنظر كامل ويصكني بظهره في طريقه .. بغيت اطيح الا شوي وسلامات وآسف .. اوك حصل خير وزوجته افطست ولفت وجهها عنا 😅 وادربي راسي واواصل طريقي ووصلت مستودعهم على خير واخذ غرضي وقلت الحمدلله الى المحاسبين واجي الا ذاك الطابور ماشاءالله وكل واحد معبي العربيه يلا انشب الحين وحنا واقفين الا ذاك الموظف وقف قدامنا بيني وبينه بنت قال تعالوا هنا محاسب فاضي والبنت ديورت بعربيتها وانا من الفرحه وراها واصك الموظف بالعربيه مع رجلووو 🥴🥴 قال اححح ياولد انتبه بغيت تحرولتي التفت عليه وانا ماشي اعتذر واقلو معليش والله خذتني فرحة الفكه من الزحمه واصك البنت اللي قدامي بالعربيه مع رجولها 😩😩 ولا سمعت الا احححح حاسب ياضيعة الوجه والموظف فاطس ويقلها انتي اللي حاسبي ذا شكله راعي حوادث قلت معليش اختي والله لهيت مع ذا الادمي اعتذر منه سويت معه حادث قبلك قالت وتقولون الحريم مايعرفون يسووقون قلت لاوالله اليوم اقتنعت انه احنا اللي مانعرف نسوق 😝 الحمدلله مر الموقف بسلام وبعدها حاولت احافظ على المسافه الآمنه بيني وبينها لمين حاسبت وحاسبت وراها وطلعت .. ولمحت الكوفي حقهم قلت وجبت القهوه يبيلنا كوب قهوه يعدل المزاج بعد هالحوادث 😁 خذت كوب قهوه وطلعت ادف عربيتي بيد وماسك كوبي بيد سالت موظف الامن برا.. اقدر آخذ اغراضي بالعربيه للسياره بالمواقف والا لازم اجيب سيارتي هنا قال لا عادي خذها امش مع الشبك بنهايته تقدر تطلع بالعربيه اوك تمام الله يعطيك العافيه بنهاية الشبك فيه نزله حقت كراسي المعاقين الله يشفيهم وانزل العربيه معها ولاني ماسكها بيد وحده وكوب القهوه باليد الثانيه روحت العربيه من يدي والحق ماتلحق ويالله لحقتها وفي خضم الاحداث طار كوب القهوه وصك في العربيه ورجع كمل علي وعلى ملابسي انا اللي هالمره جربت الأححححححح 😂😂😂 والكل يتفرج اللي يتبسم واللي يصد ويتبسم واللي يقول اسلم عسى ماانحرقت .. الله ياخذ ذا الكيف اللي ماجاني الا بذي اللحظه المهم حاولت مااخذ واعطي كثير مع الجمهور نظرا لضيعة الوجه والحاله المزريه اللي كنت فيها وادف عربيتي للسياره واخذ مناديل وامسح مايمكن مسحه واحمل اغراضي وسيده عالبيت🙁 واجي احب على راس امي وانا مبقع بقهوتي وهي تطالع وشفيك وش صار لك قلت ابد ماصار شي يمه بس طلبتك لعاد ترسليني ايكيا لمدة سنه لين يمدي الناس اللي هناك تنسى شكلي كانت ليله مررررره نايس 😅😅 وسلامتكم |
|
04-03-2021, 02:59 AM | #128 |
|
رد: لِيتْ الشّوَارعْ تِجْمعْ اثْنِينْ صُدفَهْ
استغفرالله العظيم 😂😂😂😂😂 كله كوم .. ومعك عبدالله الثهري المتقاعد كوم ثاني نفسي اعرف وش سوا عشان تشن عليه كل ذا الهجوم😂😂😂 |
|
04-03-2021, 11:35 PM | #129 |
|
رد: لِيتْ الشّوَارعْ تِجْمعْ اثْنِينْ صُدفَهْ
•
• عاشر بمعروفٍ فإنك راحلُ واترك قلوب الناس نحوك صافية واذكر من الإحسان كل صغيرةٍ فاللهُ لاتخفى عليه الخافية لا منصبٍ يبقى ولا رتبٍ هنا أحسِن فذكرك بالمحاسنِ كافيةْ واكتب بخطك إن أردت عبارةً لاشيء في الدنيا يساوي العافيةْ... |
|
04-04-2021, 12:17 AM | #130 |
|
رد: لِيتْ الشّوَارعْ تِجْمعْ اثْنِينْ صُدفَهْ
•
• ياخي بعض الناس كلامه سعاده اليوم في هايبر بنده جيت عند الكاشير ومعي اغراض وكرتون مويا طلعت الاغراض على السير بقى كرتون المويا قلت اطلعه مع الاغراض قال لا بس اقلبه ياعسل عشان البركود صراحه خقيت 😳☺ بغيت اطب بوسط العربيه مو اقلبه بس حاسب الاغراض وخلص قلي شبكه والا كاش ياقلبي🙈 وكيس الاغراض وخلاص قلتله مشكور الله يحفظك رد في خدمة الغالين ياعيوني😅😅 اعنبو حيه احس فيني جفاف عاطفي الحين وودي ارجعله 😂😂😂😂😂😂 |
|
04-05-2021, 10:29 PM | #131 |
|
رد: لِيتْ الشّوَارعْ تِجْمعْ اثْنِينْ صُدفَهْ
الصراحه كنت مضرب عن حكاية تطعيم كورونا
وموكلها لرب العالمين ولازلت موكلها لرب العالمين لو بعد مليون تطعيم ولكن الاخذ بالاسباب واجب على المؤمن يقول بن عثيمين رحمه الله الأخذ بالأسباب الجالبة للخير المانعة من الشر من الإيمان بالله تعالى وحكمته ولا تنافي التوكل فها هو سيد المتوكلين محمد صلى الله عليه وسلم كان يتخذ الأسباب الشرعية والقدرية فكان يعوذ نفسه عند النوم بالإخلاص والمعوذتين، وكان يلبس الدروع في الحروب وخندق على المدينة حين اجتمع أحزاب الشرك حولها حماية لها.. ومن هذا المنطلق قررت اروح لهم برجليني اليوم عشان يشكّوني تطعيمتهم ذي واخلص الحقيقه بعد فيه سبب ثاني حمسني مررررره كنت جالس مع ولد عمي بعد مااخذ التطعيمه واسأله هاه كيف وش تحس فيه قال ابد مافي شي بس تحس بخمووول وودك تنام بس قلت ياسلام هو ذا اللي انا ادور عليه صار لي فتره انا والنوم مره علاقتنا سيئه المهم لو ما شفتوني اليومين الجايه .. اعرفوا اني متخمخم بلحافي وداخل حالة بيات شتوي اسأل الله ان ينفع بها ويدفع الوباء عنا وعنكم وعن سائر بلاد المسلمين انه على كل شيء قدير |
|
04-06-2021, 10:18 AM | #132 |
|
رد: لِيتْ الشّوَارعْ تِجْمعْ اثْنِينْ صُدفَهْ
•
• الحمدلله خلصنا التطعيم على خير الانطباع عن العاملين بمبنى معارض الرياض فوق الوصف الصراحه الله يجزاهم عنا كل خير ابتداء من حراس البوابه مرورا بمنظمين الحركه داخل المبنى الى القائمين على التسجيل وختاما الفريق الطبي . ناس فوق الوصف بشاشه ورقي في التعامل انجاز سريع واهتمام بالزائر يبث في داخله السرور الكل يرحب والكل يعرض خدماته لدرجة تحس انك مو بحاجه تسأل عن شي الموظفين بعد كل متر الى مترين تجد من يرشدك الى الخطوه التاليه بصراحه اول مره يمر علي تنظيم حشود وخدمتهم بهذه الطريقه الجميله يكفيك الترحيب كأنك داخل عرس لدرجة امس والله حسيت انه اللي اعطاني الجرعه مااعرف اذا كان دكتور او ممرض المهم طريقة تعامله معي حسستني اني طفل مدلل مو شاب مكتمل النضوج طبعا لطفا منه مو استنقاص لعقليتي اول مادخلت سألني هلالي والا نصراوي ضحكت وقلتله افضل اجاوب بعد التطعيم اخاف طريقة التطعيم تكون حسب الميول ضحك وقلي لا مالي في الكوره لاتخاف فحسيت انه الرجال حاب يطلعني من جو الخوف والتوتر 😅 جلست وبدا الاستعداد للتطعيم رفعت عن يدي لما جاء بالابره قام يسولف معي سوالف جانبيه كيفك مع الشغل ومداوم والا اجازه عرفت انه قاعد يلهيني عن وخزة الابره يحووول هالقد خايف اني اخورها واصارخ والا انحاش المهم خلصنا وقلي روح للاخوان برا وسجل وانتظر 10 دقايق اذا الامور تمام الله يستر عليك طلعت وسجلت وسالتهم اذا مرت العشر دقايق تبوني في شي قالوا لا تقدر تروح .. فاختصرت الموضوع وتوكلت على الله لبيتنا بدون انتظار ولا غيره بس الزبده في الموضوع كله صراحه هي طريقة التعامل وكيف ان تلك الطريقه تحدد ملامح الصوره في خيالك سلبا او ايجابا عن اي مكان تروح له في حياتك واجدني هنا مدين بالشكر لهم فردا فردا الله يبيض وجيههم وشكرا لوطن وقياده هيأت لنا هذه العنايه الطبيه الرائعه |
|
الكلمات الدلالية (Tags) |
لِيتْ, الشّوَارعْ, اثْنِينْ, تِجْمعْ, صُدفَهْ |
الذين يشاهدون محتوى الموضوع الآن : 3 ( الأعضاء 0 والزوار 3) | |
|
|