في المساحة اللي أحاول فيها ألحق بخطواتي قبل ما تسبقني الأحداث.
انا رجل لا يشبه المدن مهما حاولتُ أن أبدو ابنها المدلل.
فيَّ شيءٌ من رائحة الرمـل البعيد، من الهدوء اللي يسبق نباح الكلاب ليل الشتاء، ومن عناد ما يعرفها إلا قلب ما يطيق البقاء في مكان واحد.
لو سألتوني من أكون ؟ فأنا ذلك الرجل اللي يتقن ضياع الوقت مع فنجال قهوة أكثر مما يتقن ترتيب حياته.
وأعترف، بكل لطف، أني لم أتعافَ يوماً من عادة التورّط بنظرات النساء.
كل يوم تبدأ حكاية صغيرة لكنها تحب تترك أثرها بلا إذن.
لكن… ورغم كل هالضجيج، هناك حنين وحيد ما يشبه أحد.
حنين لفتاتي البدوية اللي مرّت عليّ مثل غيمة خجولة، ورحلت قبل ما أعرف من أين جاءت ولا لأي مدى كانت تحملني معها.
لا أدري لماذا ظلّت صورتها معلّقة في صدري، ولا أعرف هل كان حباً أم مجرّد عطش قديم وجد وجهه المناسب.
لا أزعم أني عاشقٌ صالح للتاريخ.
لكني أعترف أن تلك البدوية جعلتني أكتب، جعلتني أهدأ، جعلتني أفتّش عن شيء يشبهني ويشبهها في المدائن المزدحمة التي أعيش فيها.
وهذه المدونة… ربما محاولة لأرتّب كل ذلك.
لأقول لكم من أنا، ولأحكي ما حدث وما لم يحدث، وأشارككم فوضاي الصغيرة، قبل أن تخذلني الذاكرة أو يتغلب عليّ الوقت.
بداية قصتي صحيت الصباح وأنا أهرول بين الثوب والمفتاح ومحفظتي اللي ما أعرف ليه تختفي إذا استعجلت
كنت رايح للمطار أستقبل ابن خالتي اللي يجي كل سنة وينسى ملامحي كأنه يشوف موظف جديد في شركة ما يبي يعرف أحد فيها
دخلت المطار وأنا أحاول أثبّت كبريائي
قلت أبدأ الصباح بكوب قهوة.
وقفت في الطابور أحاول ابدو هادي
بس اللي بعده؟ لا مو طبيعي
قدامي جلست بنت كانت تناظرني وعيونها بعيوني
يعني بالشكل اللي يخليك توقف وتقول لا حول… ليه القدر يسوّي فيني كذا قبل القهوة؟
كانت هادئة مركّزة وعيونها ثابتة كأنها تقرأ ماضيك ومستقبلك وتسوّي تحديث للبرنامج.
لفّة الشيلة محكمة
ملامحها مرتاحة
والهدوء اللي حولها؟ يجلدك جلد
كنت ألتفت يمين ويسار كأني أبغى أضيع اللحظة وهي بكل بساطة رفعت رأسها وطالعتني
نظرة واحدة
بس لو دخلت بطولة أقوى قلب يطيح من نظرة كان فازت بالمركز الأول وهي جالسة.
ارتبكت.
اللي قدامي يطلب لاتيه دبل شوت
قلت للكاشير
عطني زي حق اللي أخذ اللي أخذ اللي قبله
قال يعني موكا؟
قلت إي، بس… بدون موكا
حتى الكاشير استوعب إني ضايع
طلعت هي من مكانها مشيت قدامي بخطوات هادئة
مدري هي ابتسمت ولا الزمن بدّل الإضاءة بس عيونها أعطتني فكرة ابتسامة وبكذا انهار كل دفاع عندي
راحت
راحت حرفياً مثل مشهد سينمائي ينقطع قبل التعريف بالشخصية
رجعت لولد خالتي اللي كان ينتظرني وهو يشرب مويته بنرفزة:
وينك؟
قلت له وأنا أحاول أتنفس
كنت… أراجع خيارات القدر
طبعاً ما فهم شيء.
واللي يضحك
ولا سؤال انطرح… ولا اسم… ولا صوت…
بس لحظة وحدة خلّتني أفكر إذا كنت فعلاً رجل بدوي ثابت…
ولا مجرد مسافر تعلق روحه بنظرة وتمشي.
والله ما أعرف هي وين راحت…
ولا أدري هي ابتسامة صدفة… ولا بداية رواية… ولا فخ جديد من الحياة.
اللي أعرفه؟
إنها تركت فيني شيء يشبه سؤال ما له إجابة.
وعلى قولة جدّي…
يا ساري، بعض العيون تمر وتظل
انذكر لمن كان عمري 16سنة ابوي كان يسوي قهوه كل عصر ويعزم الحاره بيوم من الايام كنت اقهوي الرجال العصر لين اذن المغرب وكلن مشى وابوي دخل وكنت جالس اتقهوى لحالي فجئه اسمع صوت عند الباب ويتنحنح قلت اقلط وقلط قهويته وكان الرجال تقل تعبان وبس يتلفت اول مره اشوفه بالحاره سالني عن رجال ماعرفه وقلت اول مره اسمع بهالاسم وسكت اخذ فنجالين وقال وين الحمام اشرت له هنا قال بيصلي المغرب ودخل الحمام وابطى ورحت اشوف ماحصلت احد ورحت علمت ابوي ووصفت شكله لابوي قال قهويته قلت ايه قال عشت ولدي زبدت الموضوع انا كذاب
العرض العادي
