‏في ليلةٍ كن المسا عيّا على نور الصباح
وقفت وقفةٍ معطي الحاجه و هو محتاجها

يا رب هبّ لي من لدنك الصبر و الرأي الفلاح
و روحٍ رضاك يحوفها ، حتى تعود أدراجها

الناس .. ما في يدينهم فساد نفس و لا صلاح
عشان نشقى في سعادتها و ضحك حجاجها

عن حبة خشوم البشر مهونك يا خشم السلاح
لي نفس ترضى بـ الممات و لا تشوف أحراجها

تعلّق الأنفس هو أول عثرة و كسرة جناح
نفس تعلق مستحيل إنها تشوف أفراجها

لإنسان لا من صَبّ في قلبه شعور الإرتياح
ما عاد تغريه الحياه .. و لا علو أبراجها

عطو خطاويي طريق فيه لـ النفس إنشراح
و أعطيكم اللي في ترايبها يباهي عاجها

تخطف نجوم الليل و تحرك نسانيس الرياح
تقدر تخلي الأرض و تحط السما ديباجها

لو إن روحي باقيه بين المنازع و الكفاح
على أمل تلقى بعد مدخالها مخراجها

أنا رهين الواقع المملي نفاق و لا سماح
سمحت من صامت عباد اللّٰه و من هرّاجها

خلوني أخذ سجتي فـ المدن و إلا فـ الفياح
الأرض ما يعرف رحايبها سوى دوّاجها .