مجتمع غلاك - ياديب لاتغتر في بعض الأزوال

يقول الشاعر عبدالله بن صقيه
:
ياديب لا تغتر في بعض الأزوال = خطو العرب ياديب ما من تكانه

ما ينفعك لا من حداك أشهب اللال = اللي على الجدَّان ماكَر خيانه

ساس الردى لابد مبناه ينهال = ولد الردى أصحى تحطه بطانه

ترى الذهب من صافي جنيه وريال = ما يختلف ياديب طيلة زمانه

تلقاه وقت الضيق لا صكك الجال = الصفر لا يغريك زين المعانه

نعرف دغايل بايع الدين بالمال = فراسةً ياديب ماهي كهانه

بستان غيرك لو به الوان واشكال = ما تنتفع من خوخه وبردقانه

ما ينفعك ما فيه لو بالثمر مال = لا صار بالغدرا جداره مخانه

لياك من بيض الغرانيق تهتال = أبا الدبر لا يشحنك وهدرانه

ان جاء نهارٍ فيه للجيش زرفال = الله يخلي للعماني عمانه

ترى الجمال اللي يشيلن الاثقال = خطو الزمل بالشيل فيها حرانه

اسلك دروب الطيب مع كل رجال = واهرف هريف الذيب واعد عديانه

طرق النمايم لا تجى لك على بال = يشقى بها متهورين الديانه

الحر ميقاعه على راس ما طال = حاشاه ما يرضي لنفسه طمانه

ربعك تميم اللي لها دسم الأفعال = الخاين البَّوار ربعك عرانه

عقَّال في حالٍ وفي حال جهَّال = فيهم على راع المتانه متانه

مفضخة ياديب لعيون الأفيال = انشد جموع الفرس وانشد إيرانه

ياما وياما من جديدات واسمال = لا عَن صيَّاد الفوارس حصانه

ما هي سوالف من يزيف بالأقوال = اللي علومه عند جالي ثمانه

والناس كلً دون حقه بالاشكال = يوجد بهم بالضيق مروي سنانه

ما تصلح الجهال من دون عقال = العقل لا جاء له برجَّال زانه

الكل منا ما غدا له ولا خلال = يكفي عن الهندي بها خيزرانه

الذيب من طليان هكر الغنم ذال = اكمن لراع الصيد واحب حبيانه

ذيبً في تال الليل بالمرقب العال = نكد على النيام كثر عويانه

الله يا شيخ النحل يرحم الحال = ما عاد في راع الفطانه فطانه

لو للرعد في مظلم النوَّ زلزال = كلٍ عرف والخابر الله مكانه

لا يأمن الدنيا مرابي ومحتال = لابد من قبرٍ هيالٍ دفانه

لا مخبر عنهم ولا سايلُ سال = يعلم بهم خلاقهم جل شانه

دنيا تغر الناس لرحيها اثفال = ما هيب تركد دايماً شقلبانه

ما فات عده مات يا معرَّب الخال = ما عاد في تذكير ما فات خانه

أصفح عن اللي ما يساوي بها عقال = لابد ما نبديه سر وعلانه

وقت على الوافين بالحيل ميال = دار الفلك للدون والأمَّعانه

الرزق عند اللي نعبده والآجال = عن المقدر ما تفيد الذهانه

احد لباسه من ردا الحظ دسمال = واحد يفصل من ثمانين خانه

للرسل مادامت ولا الصحب والآل = اصبر على جور الدهر وامتحانه

المرجله ما هي سهل طرقها طوال = تتعب قليل الفود راع العفانه

من دونها عيطٍ اماليط وتلال = وسنْدا تشيَّب راس من بالحضانه

تبغي عريب معتبى نجر ودلال = اللي يشرع بالمساغب جفانه

الشكر للمعبود عصر الجهل زال = هذا زمان تفرس الذيب ضانه

نيّ البصل تلقاه مع كل زبال = العود الازرق صار شوفه ذنانه

افطن لبو دبله ترى النذل ختال = متغرض للناس مرخى لذانه

احرص عن الزلات في كل الاحوال = لا تنخدع باللي يعلج اللبانه

ما يفتري ويشين الناس رجال = راع الحكي بالناس خله وشانه

عليك باللي بالمهمات سردال = ليثٍ مثل من حط قوسه رهانه

انته وانا نبعد عن القيل والقال = كم واحدٍ ياديب ضره لسانه

احسن نصون السين بالصمت والدال = ونتبع طريق محاربين الجبانه

الهندي المصقول سوي لمن عال = الذل للأحرار ساس الاهانه

من نم في شعبان قافيه شوال = اعني خفيف ساذجٍ ببَّغانه

العقل ما من عقل والجرم توال = امسلي الأطفال كالقرقعانه

اللي تمس أعراض الاجواد الانذال = الصمت للرجال درع الصيانه

الواجب ان العبد يجهد بالاعمال = ارواحنا للي خلقنا مدانه

من عصر ابونا آدم إلى نشر الاجيال = قليل من لايشتكي من زمانه

للكرب من رب المخاليق حلاَّل = عسى حصان الظلم يقصر عنانه

ما للكفر في حوزة الدين مدخال = ما دام بيت الله يزار بْمكانه

لا شك وَصْ هلال من شان هلال = يقصر لسانه عن كثير هذيانه

ذا قول من يحرص على دسم الأمثال = القيل يكفي عن هزاله سمانه

ابيات من بين المهاديف تجتال = ما هي سوالف يا لداني لدانه

ركاب تفكيري من اللح نحال = عقب الصعاله عودت مرجعانه

ما تردم العيرات بسنين الامحال = الوادي المسني يبس ديدحَانه

يا بدو يالِّلي صوب الارياف حوَّال = الطرش ما يتبع جياعه بدانه

واسلم ودم ما هلَّت المزن همَّال = وما زاف وانور بالزهر قحويانه

وبلغ سلامي من سكن ذيك الاطلال = اجا وسلمى اللي بهلها مصانه

بني تميم وشمَّر الشمَّ الابطال = واولاد عبس اهل الظفر والرزانه

واللي سكن حايل جبلها والاسهال = ترى السلام لمن بها معك امانه

هيف السمان اهل الوفا مزبن الذال = طودٍ اشمٍ ما يحايل كيانه

من كان رحالٍ ومن كان نزال = الكل منهم باخنينه بخانه

ما ناض براق وما زايلً زال = صلوا على المختار راع الامانه

اللهم صل وسلم على نبينا وسيدنا محمد عبد الله ورسوله