|
جهل أو عدم مبالاة ؟!
صباح الخير
فيه تساؤلات ببالي وحابه أسمع مختلف الاراء وخصوصاً الامهات والاباء اللي زرع هـ التساؤلات لموو وميلاف ( حفيداتنا) كانوا يسولفون علي ببراءة الاطفال وموضوع يجر موضوع الى مَ جاء طاري الاطفال مَ الاطفال فقعدت أسولف معاهم أنا بجيب بيبي مَ عنده أهل وبنحبه ونخليه كبير ويكون أخوكم كلكم ومن هـ الكلام أنا وحده عندي رغبه من دخلت الثانوي أبي أتبني طفل وبأذن الله راح أحققها وطبعاً العائله كلها تعرف أمنيتي ذي . ف عشان كذا سولفتها معهم من الاساس لأنهم عارفين المهم أنبسطوا والوضع تمام أمس الفجر لمو جايه تقول رغوده بتجيبين بيبي مَ عنده اهل ونصير اهله قلت اي قالت تكفين جيبي واحد يشبهنا عشان البزران مَ يتطنزون علينا وعليه أخذته بأسلوب أنه ان شاء الله ابشري بأخذك معاي تشوفينه قبل قبل شوي جايه تقول رغوده اذا جبتيه البزران راح يدرون انه مو ولدنا وانك جايبته من مكان حق اللي مَ عندهم اهل قلت اي عادي واذا دروا مَ علينا منهم قالت لا تكفين ( شوي وتبكي ) اذا بيدرون لا بعدين يقعدون يتطنزون عليه وعلينا هنا زي اللي ضرب شئ برأسي كيف طفله عمرها سبع سنين تعرف تميز هـ الفروقات وشايله هم ولها يوم تفكر بالامر وتطحن بداخلها من وصلها للمرحله ذي ؟ من علمها فكرة النبذ ؟ من تركها تشيل هم الاخرين ؟ من علمها اللي مو زيك يعني كخه يعني مَ يسوى ؟ لو مو متأكده من أخوي وزوجته والله أقول تربيه مسيئه لها نفسياً وفكرياً تلوث عقلي وترسبات لاتُمحى ولاتقل بل تزيد مع زيادة السنين والله العظيم اني مَ عرفت التمييز بين المذاهب الا بالجامعة وكنت أتجنب وأشمئز من اللي أشوفها تفرق بين فلانه وعلانه ع احساس مذهبها ولونها عندنا جيران من جميع المذاهب والالوان والديانات هنا فِ الرياض والله لنا جبره معاهم أكثر من 20 سنه صاروا جدات وهم يتواصلون مع بعض والبعض منهم متبني اطفال الان بعمري ومتواصلين معاهم ومن كنا صغار نشوف اشكالهم تختلف وفهمتنا أمي الموضوع وعادي الوضع عندنا بالعكس كنا نبكي نبيها تتبني :11: ولنا أصحاب فِ دوله عربيه من الديانه المسيحيه عارفين كم لنا ع معرفه معاهم من يوم عمري سنه يعني 23 سنه اذا جينا لدولتهم يفضون لنا بيتهم ويشيلون كل شئ يمس ديننا أو لايجوز نصلي وهو موجود ويجهزون السجادات والله العظيم اني مَ كنت أقارن أو أفكر أو أتعصب أو أو وكنا نموت فيهم ولازلنا كل مَ جينا نرجع الرياض هم يبكون وحنا نبكي 💔 والله عشنا طفوله سليمة سوية متزنة طفولة بمعنى الكلمة والله مَ أدعي المثاليه وأني كامله وملاك طاهر لا لا أكيد فيني خلل فِ موقع ما أكيد فيه أفكار مغلوطه بس ع الاقل الى الان احس براحه داخلياً وسلام داخلي ومتصالحه مع العالم الخارجي كله واحس بالامتنان لامي وابوي والله ولكن الان الاطفال اللي يفرقون ويتعصبون ولايفوتهم اي امر بالله اذا وصل سن الرشد كيف بتكون عقليته ! كيف بيربي جيل جديد واعي وراكز ! اصلاً من الاساس ليش تقتلون الطفوله والفطرة السويه الطفولة يعني براءة يعني نقاء يعني لون أبيض گالقطن ليش تطمسونها وتخلونهم أطفال بفكر بالغ متحيز ترى ع فكرة الطفل يخزن ويحتفظ عقله اللاواعي بمايسمع ويطبق ويلفظ من دون ادراك . الكلام قدامهم وخصوصاً الكلام بالالقاب والالفاظ العنصريه واللي كلها سخريه وتقليل شأن وغير كذا الام او الاب اللي يتكلم عند اي احد ع طفله شعره كانه خشمه كانه لا مَ كانه ولدن لنا اي عشانه أفتح منا أو عشان أسمر منا ووووووو …… ليش تسمحون ان احد يصنف عيالكم وفق عقليته الغبيه والنتنه لو سمع الكلام الطفل ترسخ بباله وترسخ بباله الصوره المشينه للوصف المنسوب ولو سمع طفل اخر بعد نفس الشئ يعني فعلاً تساؤلات محيره ؟! كيف وليش وعشان ايش تعلمونهم هـ الاشياء او تسمحون لشخص يزرعها فيهم ؟ أنيروني بوجهات نظركم وإجاباتكم :155: |
رد: جهل أو عدم مبالاة ؟!
|
رد: جهل أو عدم مبالاة ؟!
أهنيك على طرحك وماعرفتك صراحة
اختلفت كليا عن خفايا فقسم الألعاب واتضح جانب من خفايا كله اتزان وحكمة وياخفايا مقاطع اليوتيوب الطفولية ..إذا بزرانكم يتابعوها فلاتستغربين ولاتتعجبين وربي شفا الاماراتية ولمار اللي مع ابوها عندنا اطفال ماتعلموا الكلام الا عن طريقهم وحتى بعض الحركات رغم انهم يقولون الجوال يأخر الكلام بس عيالنا جن يشذون عن هالقاعدة خخخخخ ويازين شفا ولمار ..والله ان عيالنا استفادوا منهم رغم انهم فتحوا عقولهم على اشياء بغير قصد منهن نفس افلام الكرتون ..عدنان ولينا كان يوحي لنا ان عدنان يحب لينا يعني مفتح عيونا على الحب من واحنا صغار..برضو جورجي وغيرها كثير وتوم البس يوم يخق مع بسه بيضا وجيري يوم ياخذ الشفة من بسه حلوة ابك انا وين رحت جودوني يارياجيل احس شطحت عن الموضوع هع والله ياخفايا لاتبالغين الطفولة مايقتلها شي بس لانهم منفتحين على جيل غير انفتاح جيلك انصدمتي والا هو شي عادي وبس :10ل0: |
رد: جهل أو عدم مبالاة ؟!
ومن قالك هذاصح ؟!
مقاطع اليوتيوب اعذرني بس هذا يرجع للأهل مفروض الرقابه الرقابه وهاذي اشياء تتحكم فيها انت الحريص حريص والمهمل مهمل وقبل مَ نشوف شئ الا برقابه استحاله نتفرج ع شئ بدون مَ يدرون أهالينا ع شنو نتفرج وشفا ابداً مَ وراها فايده ولايُستفاد منها نهائياً بس هاذي الافكار المسممه والفروقات الشنيعه اللي بتلازمه الى مَ يكبر وراح يربي اطفاله ع كذا اذا الاهل حاولوا يجنبونه هـ الاشياء طفل فلان وعلان مَ راح يقصرون لانهم مَ شاء الله يعددون الفروقات العشر لا والله مَ أبالغ يَ المعتفس وفيه قتل للبراءة بالمصطلحات والافكار والاوصاف |
رد: جهل أو عدم مبالاة ؟!
<المشكلة حتى هو يتابع شفا:e268aa680f:
اذا مايتابعون مقاطع اطفال وش يتابعون؟ وانا ماقول لك يعني يتابعون برامج وفيدوهات اطفال بدون رقابة اللي مايراقب أطفاله مافيه خير لهم لكن برضو التشدد والحرص الزائد مافيه خير اقدر أخلي أطفالي ينفتحون على العالم انفتاح معقول ومهذب ومع انفتاحهم أدرسهم فتحفيظ قرآن وأعزز ماكتسبوه منها بأسلوبي وعلمي وبكذا لا حرمتهم من الدنيا ولا الهيتهم عن الآخرة لايكاد جيل ياخفايا يخلو من الوساخة اللي تحاول تجذب الأطفال حتى جيلنا لكن المتربي صح مايأثر فيه ولاينجرف لها دمتي(: |
رد: جهل أو عدم مبالاة ؟!
فعلاً
لا فيه مقاطع اطفال جد تربي وتزرع قيم مَ قلت كلهم سيئين بس شفا سيئه الى ابعد حد اجل م فيك طب مدامك تتابعها :d ومَ قلت عيشهم ببوتقه وأعزلهم عن العالم الخارجي لا ابداً بالعكس الفعل هذا ضرره أكثر من فائدته لكن فيه أهالي يعلمون أطفالهم ع هـ الفكر والمصطلحات أو يسمح بأن أحد يلقنه ويعلمه لاطفاله او يمارس ع اطفاله هنا التساؤل وتساؤل عميق ؟! |
رد: جهل أو عدم مبالاة ؟!
انا ابيهم يتسلون ويضحكون ..القيم والمبادئ انا اعرف أزرعها فيهم
بدون فيديوهات لازم تكون عندنا ثقة فأنفسنا إننا نقدر نأثر فيهم عشان نقدر فعلا نأثر فيهم بدون ثقتنا فأنفسنا وحرصنا الزايد راح نعيش فصراعين صراعنا الداخلي وصراعنا معهم |
رد: جهل أو عدم مبالاة ؟!
وين التسلية بالموضوع
بالله عليك تشوف شفا تسليه لهم !! اذا تعلمهم قيم ومبادئ وتخليهم يشوفون أشياء عكس مَ تعلمهم كيف تبيهم يحافظون ع القيم ويشوفونها صح ولاقلت خلك جدي وتعامل معاهم بالمسطرة والقلم لا لا ابداً . فيه أشياء تسليه من دون مَ تزرع فيهم أشياء مضره لهم فكرياً الصراع بعينه وعلمه أني أعلمهم قيم وأزرع فيهم أفكار وأعمرها بداخلهم وبنفس الوقت أتركهم يشوفون أشياء تفعل العكس منطوقاً وفعلاً شنو هـ المجاهده وهـ التناقض اللي بيعيشون فيه ؟! ابداً مَ قلت خلك جدي وصارم ولا تخليهم يشوفون مقاطع اطفال وافلام كرتون بس مو كل مقاطع الاطفال والافلام تنفع وصالحه للمشاهده الطفوليه . |
رد: جهل أو عدم مبالاة ؟!
•
ما أسمح لولدي لو يفحط إنه يتفرج على السخافات وإن صادف وشفت إنه تابع شي أصبر للوقت اللي يقلدهم فيه وقتها أفتح معاه الموضوع لأن مسألة الفضول واردة عند الأطفال وأشرح له ليش منعته وكيف إن هالفيديوهات تخليك إنسان مستفز ولا تطاق وما يصير منطوقك كويس والدليل إنه ما عجبني وزعلت منك الحمد لله حريصة وشديدة معاه وهالأمر ضروري بالنسبة ليا أشوفه وش يتابع ولو في مرة رجع ونطق بشي كذا ماسخ وغبي ما أسكت عشان لا يمسك فيه وفعلا يبطل يقوله أو يسويه برضو لأن الأطفال ينسوا وكثيرا وباستمرار لازم نعلمهم شفا تقرفني ومدري على ايش مليونية من زين محتواها العبيط في برامج قوية وتعليمية أخليه يشوفها وبسببها صار يتكلم إنجليزي وأنا سمحت له من لما كان عمره 4 سنين عشان مخهم نظيف ويلقطوا بسرعة ويحفظوا بسم الله ما شاء الله .. كانوا في المنصة يحسبوه في التحفيظ من تلاوته الجيدة حتى الأستاذ يقول له كيف ما دخلت تحفيظ وكذا تلاوتك قلت له .. قول له إن أمي تعلمني وحريصة على ذلك بالفعل .. ما أرضى يقرأ أي كلام وهذا واجب الأهل ومدرس الإنجليزي مبهور فيه كمان والحمد لله رب العالمين أنا ما أمدح ولدي وأتباهى وأتفشخر قدامكم لمجرد لفت النظر بل على العكس .. هذا إصرار مني على إن الوالدين يهتموا بتعليمهم وتوجيههم من وهو لسا بيبي وفي هذا الزمن صاروا غير عن أول لأن كل شي في متناول اليد ولو ما لحقنا عليهم ما ينفع الصوت لو فات الآوان |
رد: جهل أو عدم مبالاة ؟!
حاولي يكون بينك وبينهم حوار بسيط ، أعرفي من زرع هذه الفكرة في عقلها الصغير !
ترى الطفل في الأجوبة يكون صادق جدّاً وتجنبي يظهر على ملامحك شيء من الرفض أو القبول الحصول على ثقة الطفل هي الأساس علشان لمّا يكون عنده موضوع يشغل باله بيجيك على طول ، الطفل في هذه المرحلة لا يستطيع التمييز بين الصواب والخطأ التوجيه قائم على كل المحيطيين حوله ، لكني أرى أن مشاركتها لك لما يدور في عقلها شيء جيد . ومثل ماقال المعتفس الزمن تغير ، وصار كل شيء قائم على ضغطت زر ، وأرى أن طاقة الطفل صارت محدودة ويجب على العائلة أن تصنع بديلاً آخر ، يوازي متعة الجلوس على الأجهزة ، وهذا الأمر لا يتحقق مع عائلة كل همها أن تحصل على القليل من الهدوء لو كان على حساب الطفل ، هناك فرق هائل بين التربية والرعاية ! قد لا يعرفه الكثير . آتمنى أن تكون الأجيال القادمة أكثر تطوراً وانفتاحاً ، لننعم بجيل مختلف ، لا يحمل أفكار مترسبة من عقول الآخريِن . خفايا طرح راقي ، ليس مستغرب منّك ، إِعجابي الشديد . |
رد: جهل أو عدم مبالاة ؟!
اي والله اشوفها تسلية
لاشجعت على كفر ولا على مجون طفلة بريئة حتى أمها ماتظهر الا بصوت مشكلتكم خوفكم على ضياع القيم..وتنسون ان الخير باق في الأمة الى قيام الساعة عيشوا حياتكم وخلوا الاطفال يعيشون حياتهم بتوجيهكم لهم للخير ولاتمنعوهم من المرح وحذروهم من الشر..وادعوا لهم بالصلاح والله لو ما اراد الله لهم صلاح مايصلحون لو يعيشون عمرهم كله فمسجد وكلامي ياخفايا مو موجه لك شخصيا موجه لكل من يشدد على اطفاله فيه ناس قسم شفتهم عقدوا عيالهم حضرت على طريقة تربيتهم لعيالهم وهم اطفال وشفت وش نتج عن شدة تربيتهم ياسجون يامخدرات ياسفريات لمنكر اعذريني لتكرار مداخلاتي النقاش جر بعضه الين وضحت كل افكاري وقناعتي وهي المداخلة الأخيرة آسف وشكرا لسعة صدرك خفخف (: |
رد: جهل أو عدم مبالاة ؟!
إيمي
فعلاً معاك حق ومتعب الوضع لكن ثمرته جميله ومرضيه :11: والله يخليك له يَ رب :11: |
رد: جهل أو عدم مبالاة ؟!
عزيز
ابداً والله بالعكس أحاول أجاريها وأحاورها بحجم أفكارها وعقلها وأخذ وأعطي معاها ولا أجيها بأسلوب النهر والصواب والخطأ المباشر عزيز الوضع لو ع الاجهزه مسيطر عليه وان فلت أحيان نرجع نحكم السيطرة لكن الاشخاص البالغين نفسهم هم اللي يوصلون لهم رسائل وأفكار ترسخ بعقولهم يَ من خلال السمع أو الفعل أو من خلال أطفالهم اللي معيشينهم فِ هـ الامور ويصفقون لهم ويضحكون والله أوقف منبهره الى حد الصدمة منهم !! آيش الغاية ؟ |
رد: جهل أو عدم مبالاة ؟!
المعتفس
شوف من اشياء شفتها في قناتها والله ابداً مو مسليه ممكن لك گ بالغ بس گ طفل مسلوخه منها الطفوله سلخ وتأثيرها السيئ ع الاطفال عجيب من واقع شفته .. وبعدين يَ أني أخليهم يتفرجون ع كل مَ هو مصنف ضمن الاطفال ومَ فيه عُري وشخلعه وان كان يرسل رسائل مبطنه فِ التصرفات والالفاظ والافعال يَ أني أحرمهم مرا وحده لا لا أهون من كذا الموضوع مليان ملي بالقنوات المسليه والطفولية وأنا مع الحرص والمراقبه لكن مو الخنقه وأعيشهم ببالونه ولو المعتفس مَ طرحت الموضوع ذا الا للنقاش وتبادل وجهات النظر نورت :155: |
رد: جهل أو عدم مبالاة ؟!
-
يا خفايا الموضوع بسيط الأسئلة ما جتك من طفل غريب أو عابر جتك من بنت أخوك على ما فهمت وعلى حسب ما فهمت برضو إنك تثقين في تربية أخوك وزوجته وإنهم تحت نظركم ورقابتكم فخذي أسئلتها على محمل البراءة وجاوبيها بالشي إللي إنتي حابة تزرعينه فيها لسة عمرها صغير وتحت تأثيركم وأي أسئلة منها من باب الفضول لا أكثر |
رد: جهل أو عدم مبالاة ؟!
بالفعل ريانة
ولكن لو كان سؤال عابر أخذته من باب الفضول لكن التكرار بنفس الموضوع ولمدة يوم كامل وهي تفكر بهالموضوع ويوصل الامر أنها تبكي أبداً مو فضول ولاسؤال عابر لذلك طرحت هـ التساؤل لانه مو فضول يشبع وخلاص لااا سؤال بخوف سؤال برغبة وتردد سؤال يتردد فِ نفسها وهـ السؤال مَ جاء من عبث جاء من واقع شافته أو سمعته |
رد: جهل أو عدم مبالاة ؟!
اقتباس:
موضوع التبني يُعتبر كبير على عمرها وشكلك لما إنتي وضحتي لها الفكرة تذكرت مقطع شافته في اليوتيوب يخص هذا الموضوع وراسخ في ذهنها أو مشهد شافته من مسلسل في التليفزيون ويمكن هالطفلة كذا فطرتها الله خلق فيها الفهم والتفكّر والتعمّق ما شاء الله هالجيل يصدمك بأمور كثير وترى ما معاك إلا تتكلمين معها وتسأليها وتأخذين الجواب الشافي منها لأن إحنا كل شخص وله وجهة نظر نتيجة تجاربه مع أولاده فالبعض يشوف إن الجوالات لها تأثير والبعض لا ، ويستحيل هالشي أنا شخصيًا من خلال إللي لاحظته إن لها تأثير وقوي ، حتى في اللهجة عندي إثنين من العيال لهجتهم بعيدة عننا وعن المنطقة إللي نسكنها بالكامل 😕 وواحد كان يبكي دلع مثل شفا بالضبط وهذا إللي كرهني فيها وهي طفلة بلا ذنب والكثير الكثير من سلبيات تملّك الطفل للجوال وفي الأخير هم مساكين والله إحنا إللي ندخلهم عالم غير عن عالمهم عمومًا .. الله يطمّن قلبك ويوفقك في أمرك ويحفظ أطفالكم وأطفالنا ويصلح حالهم |
رد: جهل أو عدم مبالاة ؟!
شدني الموضوع ومحتواه فأبيت ألا أمر مرور الكرام دون أن أدلي بدلوي فيه لعله تتحقق الفائدة المرجوه لنا جميعا
لا يخفى عليكم حب الفضول والاستكشاف لدى الاطفال ومدى تأصل هذه الصفه في سلوكهم وتحكمها بغالبية تصرفاتهم وردود أفعالهم ، حيث يتضح تأثيرها ببداية حركة الطفل ومقدرته في السيطرة على الأشياء التي تكون بين يديه والوصول لما هو أبعد عنه ، في هذه المرحلة كثرة الحركه والعبث بالأشياء هو ما يترجم الفضول وحب الاستكشاف والمعرفه. حتى ينتقل لمرحلة الكلام والفهم وفي هذه المرحله يتسع ادراكه قليلا ويزداد الفضول لديه والتركيز والحفظ فيما يلج الى مسامعه او ما تشاهده عيناه ، ويبدأ بالتساؤلات وفي طرح الأسئله لإشباع غريزته المعرفيه وحب الاستطلاع. وهنا يكون الطفل على مفترق طرق إما أن يجد الإحتواء والتعامل الحكيم والصحيح ، أو يبقى رهينة المفاهيم والإنطباعات الخاطئه التي تولدت لديه مما سمع وشاهد. وكما يعلم الجميع أن التعامل مع الأطفال في زمننا هذا صعب جدا ، في ظل انتشار القنوات ووسائل الترفيه الإلكترونيه ، ووسائل التواصل الإجتماعي بما تحتويه من مفيد ومسئ ،ناهيك عن سهولة الوصول إليها دون جهد أو معرفه او قيود ، وبغض النظر عن المستخدم صغيرا كان ام كبيرا واعيا او لا واعيا . وزد على ذلك المجتمع الذي لا نستطيع العيش بمعزل عنه ، وتأثيره القوي في سلوك الأطفال وتصرفاتهم بسبب التباين الكبير في التعامل معهم من أسرة الى أخرى. وحتى الانعزال بحجة المحافظة عليهم وعدم التأثر سوف ينعكس سلبا على قناعاتهم وردود افعالهم. لذا من وجهة نظري المتواضعه ، ارى ان يتم مشاركة الطفل المشاهده لاي قناة يوتيوب او مسلسل اطفال كرتوني او غيره ، من فتره لاخرى والتعليق على المشاهد سلبا او ايجابا ، ويسري نفس التصرف على ما يسمعه ، والرد على أسئلته بكل انتباه ومصداقيه وعدم تجاهلها او اظهار اللامبالاه او المماطله ، وبذلك تخلق لدى الطفل بذرة فكر واعي يستطيع مع تغذيتها التمييز بين الخطأ والصواب. وعوده على لب الموضوع وهو التصرف مع الطفلتين لمى وميلاف وتساؤلاتهما عن طفل التبني واستيائهما من الفكره التي وصلت لمسعهما بطريقة او باخرى ففي هذا الزمن لا نستطيع ان نصم اذان الاطفال او نغطي عيونهما فنسبة الذكاء والترميز عاليه جدا سبحان الله ، فإنني ارى الجلوس معهما والنزول الى مستوى عقلهما واظهار الاهتمام بالحوار والتحدث بعفويه ، والدخول للموضوع من باب الرحمه والحنان وحب الله لنا ودخول الجنه في حب اليتيم وانه بلا اب او ام او اخ او اخت ، والابتعاد عن مصطلح التبني والاخ والاخت كون فطرة الطفل مجبولة على حب الذات والتملك والغيره شيء طبيعي ، حتي يتم استيعاب الفكره بهدوء وتغير الانطباع الذي تولد لديهما مما وصل الى مسمعهما وبالتالي التحول من الاستياء مما سمعاه الى النقد والدفاع. واخيرا حاولت الابتعاد عن الاسهاب لان الموضوع مهم والحديث فيه يطول واعتذر على الاطاله والله يوفقنا جميعا |
رد: جهل أو عدم مبالاة ؟!
بالنسبة لتنمر الأطفال؛
بالمختصر الخلل في التربية التربية قدوة قبل ان تكون اوامر ونواهي، بعدين الاطفال عندهم ذاكرة قوية يحفظون الالفاظ اللي يسمعونها و يحاولون يعرفون ايش معناها وكذلك الافعال عندهم تساؤلات يربطونها بخيالات واسعه لان عقولهم ليسا صغيرة، لذلك مهم و ضروري الانتباه في تربية الطفل حتى اذا الطفل مو طفلك لا تتكلم قدامه بالفاظ ومصطلحات سيئة، ولا تنمرات و سخريات من الاخرين .. بالنسبة لحفيدتكم ؛ ان الموضوع يدور في بالها هذا جداً طبيعي، اما تخوفها من سخرية الآخرين هذا يرجع للبيئة التي نشأت فيها سواء بيت او مدارس او اصدقاء. ____ خفايا: موضوعك جداً جميل :10ل0: |
رد: جهل أو عدم مبالاة ؟!
تعقيباً ع وجهة نظر كلمات :
الخوف من السخرية من المجتمع الخارجي وليس البيئة لأنه ببساطة أصبحت السخرية تمارس بفخر وتفاخر وتنسب للفكآهه أو تنسب للقوة . لذلك طرحت تساولي .. نورتِ كلمات :11: |
| الساعة الآن 05:16 AM |
Powered by vBulletin® Copyright ©2000 - 2024, Jelsoft Enterprises Ltd. TranZ By
Almuhajir
هذا الموقع يستخدم منتجات Weblanca.com
adv helm by : llssll
new notificatio by 9adq_ala7sas
User Alert System provided by
Advanced User Tagging (Lite) -
vBulletin Mods & Addons Copyright © 2024 DragonByte Technologies Ltd.
بسرقتك لأفكارنا وجهد اعضاءنا أنت تثبت لنا بأننا الأفضل ..~