|
): عفستي (:
برضو مشروع مدونة تحت الإنشاء وقابل للإزالة زي اللي قبلها
<بتذبحه رانيا :461: لاع لاع هذي غير قابلة للإزالة إن شاءالله |
رد: ): عفستي (:
افااااا
تغير رمز فيسي ابو سن كان اول كذا >:m1: ومدري ماعاده فيه والا انا ماعاد أشوف هذي وكلها اربعه ايام اللي غبتها:461: |
رد: ): عفستي (:
مستمتع بإجازتي ..صح خربت وماسافرت بس عادي أهم شي مافيه دوام
كنت ناوي اقضيها فكالفورنيا اشمعنى كالفورنيا والله مدري بس أحبها فيسي وينه ابو سن مع اني ماعمري سافرت برا بس ماسكه معي إلا أسافر لها حتى مدري اذا كتابتي لها صح كالفورنيا والا منقص والا مزود حرف :461: المهم اني باروحها اذا الله احياني السنة ذي كلها كانت عصيبة لكنها انتهت الحمدلله بنصري كالعادة وكان باقي شوي من أثار حربها علي..وقلت آخذ فترة راحة شهر شهرين من كل شي وأسترخي..بس لني بطل حسيت اسبوع فترة كافية وكثيرة بعد علي اللي قهرني فيني الأيام اللي فاتت والسبب الرئيسي اللي خلاني افكر ابعد عن كل شي اني تلخبطت فنفسي وضيعتني يعني اول.. مااعرف صدقي من كذبي برا النت وداخل النت الأيام الأخيرة صرت اعرف كذبي من صدقي وهذي مصيبة بالنسبة لي والله الزبدة إني أعدت ضبط مصنعي وكلش تمام الحين |
رد: ): عفستي (:
|
رد: ): عفستي (:
فحي يكثرون به المجانين قبل البارح
طلبت من بوفية ومشيت بالسيارة مسافة بسيطة ووقفت عشان آكل بعيد عن درب السيارات وفمكان مظلم شوي الا واشوف مجنون أعتدت على شوفه بنفس ترسيمته غتره وعقال على سروال وفنيلة..بس هالمرة مهو لابس فنيلة"مفصخ"معه ثلاث قوارير مويه وواضح مع حرارة الجو إنها باردة حيل ..حط الشماغ والعقال على جنب وصب القوارير على راسه وجسمه وثم رسم بشماغه وراح. وآنا آكل ومركز عيوني عليه شوي الا ويضرب واحد على القزازة بقوة..فجعني :m1: طلع مجنون ثاني بس عنده نسبة عقل شوي وأشر لي بيده وفهمت انه يبي فلوس ..فتحت الدريشه الا ويفطس ضحك ويتكلم بس مافهمت كل كلامه ..بس لما قام يأشر لي على المحل اللي كان المجنون الاول يغتسل فيه فهمت إنه يضحك عليه وفهمت بعد منه إنه يقول لي في الحي اربع مجانين غير المجنون ابو القوارير<مسوي طالع منها :m1: قسم فطست ضحك وضحكي مو على مرضهم ..الله يشفيهم ويرفع عنهم ولا يبلانا الظاهر إن الانسان طالما فيه نسبة عقل ولو بسيطة فعنده نزعة إنه يشوف نفسه أفضل من غيره ..وهذا اللي ضحكني والبلا مهو في الجنون البلا في العقل إلا طبعا من رحم ربي تذكرت شطر للشاعر سداح يقول:من يشتم المجنون ماهو بصاحي وبيت لسعد علوش العقل نعمه لكن أحيانا يسبب الانتكاس يشوفك إن العقول اليوم ماقل وندر وصباح المجانين:131: |
رد: ): عفستي (:
منهمكة في تثبيت قناعها
وأنا منهمك في إظهار نفسي مغفل صدق أنه وجهها الحقيقي كلانا في "حفلة تنكرية" والعفسة بريئة من هذه الحفلة |
رد: ): عفستي (:
..إشادتِك نجمة شرَف في سمائي
.........تِفْرِح مثِل ُفرْجَه بعَد موقفٍ حَرْج ......والشعْر مايخلْى مِن الببّغائي .........وساق ٍسليمه فيه لايْغيظها العُرْج ...شاعر رجِل وآخر خفيف وْنسائي ..... شعرٍ شعور وْشعر بس تقْفيَةْ هَرْج ...أسرج أصيلة فوق رِجْم انزوائي ............ لالبّسوا مستشعره للبقَر سُرْج معتفس |
رد: ): عفستي (:
فيني شوفة نفس فظيعة .. بس مع اللي مااتقبلهم أو فيهم شوفة نفس
بس أنا أدبلها..يعني فوق مايشوفون نفسهم أشوف نفسي زيادة فيه ناس يشوفون ذا الشي عادي وانتصار لنفسك ..لا مو عادي إن جينا للجد وهذا مو خلق المسلم ..بس عجزت أتخلص منها أو ع الاقل أكون أكثر مرونة وتقبل لهم خلوكم من كلامي ذا كله وارجعوا معي لكلمة فظيعة اللي فبداية كلامي كلمة "فظيعة" فظيع معناها كما جاء في المعاجم اللغوية ..رديء أو شنيع أو قبيح الزبدة كلمة مهي زينة وتقال للذم لكن مع مرور الزمن والعصور أصاب هالكلمة تطور دلالي وخرجت من معناها الدلالي من الذم للمدح وصاروا يقولون فلان فظيييييع على انهم يمدحونه تماما مثل أكثر عاداتنا وتقاليدنا ..انسلخت من مدري ويش الحقيقي مع التطور والتحضر وصرنا نمدح اشياء كنا نذمها سابقا..واقصد العادات والتقاليد اللي اثنى عليها ديننا موالعادات الفاشلة زي يقول لك النظرة الشرعية عندنا عيب يابوي سر امها انت وبنتك والله لاتشرفني لا انت ولا بنتك ولا قبيلتك كلها استغفرالله بس مسوين ارجل من الرسول عليه الصلاة والسلام وعادات ثانية ماتمت للاسلام بصلة انا وش كتبت فوق هع اذكر اني انقز من رصيف سالفه لسالفه بس وش كتبت بالضبط مدري ومابي اراجع كلامي |
رد: ): عفستي (:
^
ياليتني راجعت..كان لحقت أعدل قبل ينتهي وقت التعديل |
رد: ): عفستي (:
|
رد: ): عفستي (:
مانمت من امس مع ان دوامي مسائي وجاي الصبح
ومابقى شي على دوامي اليوم عسى ما اجيب الطعه في الشركه اليوم عاد يدورونها علي والله |
رد: ): عفستي (:
رجعت أكمل إجازتي بعد ماقطعتها عشان زميل في العمل صار عليه ظرف وداومت عنه وخلصت الحمدلله
الحين رجعت لفترة النقاهة والاسترخاء فبالي أشياء كثيرة ودي أسويها |
رد: ): عفستي (:
.......الجمْع طرح وْضرب الايام قسمه
.........وبعض الألم آلذِّ لي مْن السلامه |
رد: ): عفستي (:
من أقرب قصائدي لقلبي قصيدة "شرس تروضني طرف ابتسامه"
هالشطر كان دايم أحطه عنوان مدوناتي..والله يذكر ذيك الحمامه بالخير .......نوحي حمامه وانا مثلك ابانوح .............والذيب مايْعيبه عوا ياحمامه بي جرح من خمسة عشرعام مفتوح ................غديت منّه سُخْريَه للنعامه قولي من أنت ؟آقول:جسمٍ بلا روح .......وانا الذي جت طعنته من حسامه وانا اللي إن همِّش فماهوب ممسوح .............وانا ضيا ناسه وناسه ظلامه طبعي غموض وْمشيتي كلها وْضوح ........شَرِس ..تروِّضني طَرَف ابتسامه ..في عالم الاوهام لي دوح وصْروح ...........وفْعالم الواقع لي أثقل غمامه ......كل ما لمحت لْغادتي بارق يْلوح .........سوّى فخدّ الشعْر حزني علامه ....واللي نفث من روحه فآدم الروح ................مامرِّني يبكيك يابو دلامه ..أقسى من الدمعة على قبر مذبوح ............وامر من دهْس العدو للكرامه |
رد: ): عفستي (:
الأيام ذي اللي يحاول يزعلني احسه معطيني هدية والا متجمل بي خخخخ
اي والله جالس اختبر نفسي واحاول ارجعها زي قبل وتقريبا نجحت ومن هذا المنبر اشكر كل اللي حاولوا يزعلوني :m1: والله يامضت أيام خربتها بيدي ولساني واصابعي ..مره كنت انفعل بسرعه بس الحين رجعت زي قبل يعني رجعت هادي بس هدوء مستفز ويقهر..نفس هذا يعني >:m2: خخخخ |
رد: ): عفستي (:
|
رد: ): عفستي (:
|
رد: ): عفستي (:
بعْض المحبه تجيب الضغط والسكَّر
وبعْض المحبه تِخفَّف عنْك الاوجاعِ ياصَدْع راسي ي راسي بسِّك تْفكِّر جايع وهالحب ماهو كفْو لاشباعي مادامها وِصْلت اليا باب متْسكِّر فْعَرفت للدَّخْلهَ وْباعْرِف لمطلاعي فامان هجري مدامك صرت تتنكَّر أغليك بس الغلا مايلويِ ذْراعي معتفس |
رد: ): عفستي (:
اخس شي في الحياة يوم يطفى جوالك شحن وتشحنه فترة
وبعدين تجي وتكتشف انك ماانت مركب الشاحن صح وللحين صفر:418: |
رد: ): عفستي (:
محادثة لي مع رانيا في الخاص
أنا :أنا ما أؤمن إني أرد بعقل على شياطين رانيا :من العقل احيانا اننا ما نرد بعقل حبيت ردها حيل^ كبيرة يارانيا(: |
رد: ): عفستي (:
...............ممرَّات الحياه اللي سَرَنِّي
...................على جرَّة خُطاهن جَرجَرنِّي .............أمِدِّ "لْفِلمهن " نظرة خشوعي ..................... لَ منهن سَمَّعَنِّي وْفَرِّجَنِّي ............لهمسه "للأمومه" قَبْل لاارقد: ..............وليدي اكبر.. وِشيل الحمْل عنِّي ............لأفاعي فِشْجَرة تَحْرِس ثمَرْها ....................وْليال فْزاويَة خوف اخْنِقَنِّي ..............لمِشايِخْة الخديعه بالشريعه ......................لهذا الطِّفْل مِتْلبِّسْه جنِّي .......لكرهي المدرسه لاجحاف فقري .................وْدروسٍ في البشر مافقَّهَنِّي ....................لأوَّل ماصدَف عدنان لينا ...................لْنهايه كفَّها بْدمع مْتَحنِّي ....لْمراهَقْتي وِرَسْم قْلوب واسْهُم ................وِنَقْش الإm في لوحات فنِّي ..............لِحِلْمٍ كان "ينفث" بي خياله ........قَبِلْ لااصحى بصفعة [حسْن ظنِّي] ......... لأسامي أصدقاي فْغير عصري ..................... وِصفحاتٍ فِسِجني حررنِّي ............(لْ أَنا العَبْدُ الذي خُبِّرْتَ عنْهُ) ..................(لْ أَلا أَبلِغ أَبا مَخزومَ عَنّي) .....(لْ فَما هِبتُ الفَرَزدَقَ قَد عَلِمتُم) ..............(لْ أَخالِدَ لَو سَأَلتِ عَلِمتِ أَنّي) ......(لْ وَلُقِّبْتَ المُسَدَّسَ وَهوَ نَعْتٌ) ...............(لْ وَما نيْلِ المطالب بالتَّمَنِّي) .................لأوَّل [عيد ميلاد] لْقصيدي ....................فِليله مات فيها بَعْض مِنِّي ................لْتأَبط شر قلبٍ غصْب عنَّه ................. رأى بَعْض التأني من التَّدَنِّي ..........عجول إن حوَّطَت طُهْره أسِنَّه ..........................يغير بْيالثاراتي وْيِثنِّي .................لأوَّل مابزَغ نجْم لْشبابي ........................إلين أحلام أمي حَقِّقَنِّي ............لأوَّل آخري مْن الشَّطْر هذا: ..................[كُثُر ماهي اصْقَلَنِّي غَرِّبنِّي] ..........أقول أحيان ياطوبى لمثلي ........واصيح أحيان وين اشباهي عنِّي؟ ........ولاالقى لي شبيه إلا [قصايد] ................خذن منِّي كثر ماهي عطَنِّي ...........كثُر ماني أحس اني أبوها ...................أحس اني وَلَدْها بالتَّبَنِّي .....خُلِقت مْن الحجار آشق "مائي" ......................وأنهار -الحجار يْفَجِّرنِّي المعتفس |
رد: ): عفستي (:
مالي حظ
كنت اسأل رانيا عن التصويت في الجولة الثانية للمسابقةوقالت لي مافيه وتوقعت الجولة الثالثه فيها قسم ناوي اقيم الجميع صفر من عشرة الا نايف ووفا كنت باعطيهم واحد من عشرة ..عشاني احبهم شوي وطبعا الجميع مبدعين بس تصويتي مجرد عنصرية مع معيضة اللي اخر شي كرشتني من الفريق :m1: بس طلعت معيضه ومافيه تصويت اصلن |
رد: ): عفستي (:
https://i1.sndcdn.com/artworks-00010...3-t500x500.jpg
فتاحي ألبي وخيدي منو شي ناره مهما فتلتي مافي متلي بالحاره |
رد: ): عفستي (:
.........كآبه في كآبه في كآبه
......ونفس الأسئله من دون إجابه ..فِراسي العاديات الضّبْح غارت ....وْفِصدري طَعْن لِسْيوف وْحِرابه ..إلى من جات من لحمي ودمي ....سكوتي صعْب والأصعب أَجابِه ........وانا رغْم انكساري داخليًا ...........مُمَثِّل بارع فْدور الصلابه ......وِدمْع الفارس المغوار شعرًا ....... عَوِي والْعَوْي ماعاب الذيابه ....قصيدي ياقصيدي ياقصيدي .......ووش يعني يشوفونا بْغرابه؟! ....نعيش أغراب من عادك تِتَأتئْ .......وطوبى لْمثلنا فْعصْر التَّشابُه المعتفس |
رد: ): عفستي (:
مع اني مداوم الحين ومكروف بس احس فراغ جواي
قررت اسلي نفسي . واشتركت مع النصابين حق تدوال الاسهم اللي في النت .. واتصلوا علي ..وجالس اطقطق عليهم واحاول اعشمهم وانصب عليهم رغم ان النصب عليهم شبه مستحيل..بس باجرب أفكر اعطيهم طعم مبلغ واجرجرهم بعدها..بس المشكلة اخاف يرضون ويقنعون في الطعم ويسحبون علي بعدها ويروح علي المبلغ:m1: حلو هالشعور في التفكير ..من زمان ماشغلت مخي :m1: زي لعبة الشطرنج..بس خصمك في الشطرنج فيه مجال تقابله بعدها هذولا النصابين لااا مافيه مجال بس حطيتهم فراسي زي ماكنت احط فراسي المعالجين الروحانيين النصابين واكرههم فنفوسهم مو عاد يكرهون نفوسهم بمعنى الكلمة اقصد يعني احسسهم انهم ضيعوا وقتهم مع واحد فاضي |
رد: ): عفستي (:
https://www.marnys-ksa.com/wp-conten...0sads.jpg.webp
كالعادة ..أجيب لكم أشياء مجربها على نفسي وعلى الكثير غيري قبل أنصحكم فيها اللي قادر يشتريه ..لايبخل على نفسه ..فوائده كثيرة خصوصا أصحاب الوزن الزائد واللي يبون يبنون عضل وهنا شرح مفصل عنه ..ومين االي يستخدمه ومين اللي مايستخدمه https://youtu.be/G9qrl8ds5PE دمتم سالمين |
رد: ): عفستي (:
.....عزمي قوي بس المشاعر رقيقه ....أدنات نسناسٍ يمرجح غصِنْها ............يامن بيدِّك أمْر كل الخليقه ....ألطف بروح تْغَرَّبت في وطنها ..........ماعادت حْبال القرابه وثيقه وحتى الصداقه صدْق روَّح زمنها ......ماحولي إلا مْزَوِّد الضيق ضيقه ......وناسٍ عِطِرْها مايسَتِّر عفنها(: .............حثالةٍ لو من قبايل عريقه ......بجنح باعوضه خفوقي يزنها معتفس |
رد: ): عفستي (:
كم أحترمني
أحترمني كثييييييير بشكل مااتصوره مع إني مااحبني بس الحب مو شرط للإحترام يحدث أن نحترم أعداء لنا |
رد: ): عفستي (:
اشتقت أسمع ضحكتي من جِناني
كثْراشتياقي لْموت شعري وِحسِّي |
رد: ): عفستي (:
على طاري" الكآبه" و"أدويتها "والأرق" والليل
نفثْتِ "اللي.. لها بين.. المحاني "صوله" وْجوله فراسي للهجوس اسمع مثِل دبْك لْحوافر خيل ومن "أجداثها" قامت.. لها" أحلام".. ""مقتوله |
رد: ): عفستي (:
ياربي لك الحمد رجعت لي الكوابيس
يوووووه زمان عنها البارح اربع كوابيس ورا بعض والله كابوسين أسود اففففف رعب والله خصوصا لما اصحى احسه حقيقي ورعب مابعده رعب بس رعب بلذة وفرح مدري كيف اشرح لكم الكابوس الثالث ناس مسكوني ويبون يعذبوني قدام اهلي قلت لهم وانا ابكي لاتعذبوني قدام اهلي عذبوني بعيد عنهم واقتلوني بعد اهم شي مو قدام اهلي ..بس قهر صحيت قبل يعذبوني وجهي يقهر وانا ابكي في الحلم كريييييييه بعدها تحمست انام ..والبارح بس النوم مايعاند معي رهن اشارتي مع ان مافيني نوم حطيت راسي الا واشوفني فقضية كبيرة مايصلح اتكلم عنها صحيت على الفجر بابتسامتي ونشاطي وبصدر شرح ومسكت معي اسافر بريدة حبيبتي وهذاني فيها اليوم يوم الفله والوناسه عقبالكم |
رد: ): عفستي (:
|
رد: ): عفستي (:
......لو فيِّ غِلْظ الفرزدق فِيِّ رقَّة جرير
.......ولااوجع من دْموع كان الشِّعْر منتوجها .......كم في مواقع تواصلنا مِقَدِّي ضرير ............ويأجوجها من أمام وْخلف مأجوجها ....واذاانكر اصوات خلق الله صوت الحمير ........ماانكر من العوْجَه اللي تجْهر بْعوجها .............مهجَّنين الديانه غافلين الضمير .........استجْمَموا في الذنوب وآمنوا موجها ......... صار لْعُفون البشر تُبَّع وِنجْم وْزئير .................وْعُقَّالنا اليوم سُخْريَّه لمرجوجها ...والياطغوا البربر فْماني بموسى النصير ............والناس حُرَّه.. فِممشاها وِفِفْروجها ...............لكنَّها غيرة المسلم وِطبعه يغير .............اليا عثا الدود في الأمَّه وِفِمروجها |
رد: ): عفستي (:
ودي أسولف لكم عن عشبة شوك الجمل
أو عشبة العاقول لها أكثر من إسم ..بس هذي أشهر إسمين لها بس مافيني حيل أكتب ابحثوا عنها ..يجوز يجي فبالكم تجربوها طعمها قريب لليانسون..وباختصار تنقي الجسم من السموم |
رد: ): عفستي (:
طفلة ٍ في روحها غنـْجة كـــلام
تسحرك فـي مــزحها وفـْجـدّها |
رد: ): عفستي (:
ههههههههههه مب صاحي انت صدقني ،
^ ليش ياوفا:m1: مكبرين سالفة حبي الكوابيس انتم ومستغربين وتفكروني استهبل والسالفة عادية زي اللي يحبون يلعبون العاب الموت والرعب في الملاهي بس هم يدفعون فلوس وانا مجانا على فراشي خوف إثارة مو الخوف ذاك اللي مدري شسمه دام الكوابيس مطاردات وحيوانات وقتل فعادي دامه انا لو انه فاحد يقرب لي كنت باقول لك ماحبها ..يعني زي مثلا موت قريب لي هذي مااحبها |
رد: ): عفستي (:
الناس المختلفة والمتميزة بشيمها وأخلاقها من سوء حظي ماأصادفهم
كل يوم ولا أسبوع ولا شهر ..يستغرق الأمر سنين ويمكن عمر حتى أصادفهم وإذا صادفتهم وعشت معهم فترة تبعدهم ظروفهم عن المنطقة اللي أنا فيها يظل بينا تواصل من بعيد ..بس التواصل اللي من بعيد مايجبر كسر فقدي لهم ولكن تستمر الحياة على قولة سلفر رئيسي المباشر بينقل وهذا آخر اسبوع له معنا هذا سبب كل كلامي اللي فوق وهو شاعر معروف على مستوى الساحة اول مره صراحة اشوف شاعر فيه خير..ومايعني كلامي إن الباقي مافيهم خير لا اقصد يعني اول مره اتعرف على شاعر فيه خير العادة كلهم من جنبها واكيد فيه شعراء فيهم خير بس من سوء حظي ماعرفتهم لحد يقول حتى انت مافيك خير ..انا ماني شاعر انا مجرد شخص يكتب شعر أحسن من كثير من الشعراء بس مو شاعر اذا قلت عن نفسي شاعر لكم الحق تتكلمون والله يافيني غصة عليه ودي افقع وجهه قبل ينقل بس احبه فيني حرة مدري كيف اطلعها يارب يجي ذاك اللي يخرب المنتدى وينزل موضوع وماتحذفه رانيا وتخلينا رانيا ناخذ راحتنا فشتمه وسبه على الاقل حلال فيه السب ومهما تتجاوز معه فكلامك تحس يستاهل |
رد: ): عفستي (:
حابب تفرغ طاقتك ب اي شئ ’ صح صعبه لمن تحب شخص يروح وتآخذة الحياة . شعور بشع اتفق بس كذا الحياة ي آخ مش دائما تجمعك مع الطيبين او اللي ترتاح لهم نفسك تعوذ ب الله وادعي ل رئيسك وعيش اللحظات لانها اخر شئ بتكون واكيد راح تتواصل معه ومرات ممكن توجبه انت
^ هلوو ريفا قلعته ي شيخه خليه يروح شعور وقتي انتهى بعد مااكلت قطعة من طورطه:m1: ي شيخه ليته راح من زمان دام فيها كيك مجوعتنا هالشركه :m1: استغفرالله بس المشكلة ندمت اني كتبت ردي وماعاد يتعدل ومتأكد بعد إنك حتى انتي متندمة الحين من تعاطفك معي ولو يمديك تعدلين التقييم او تحذفينه ماترددتي :m1: |
رد: ): عفستي (:
ياكثر ما أكتب وأمسح
تبا وحبا للمعتفس |
رد: ): عفستي (:
كثير اعرف أزواج تطلقوا قريب ولهم فترة مهي قصيرة مع بعض ومنهم أقارب
بس مااقدر أسألهم وش شعوركم وكل شي فلمح البصر انتهى بينكم انا مااعرف بس احسه شعور صعب لأني أنا كائن تعودي صح وقت العناد اجازي العناد بعناد وظاهري بايعك بريال و ماتعني لي شي بس صراحة فداخلي غير ..هذا مع الناس اللي عاشرتهم اجل كيف لو إنه مع زوجة الله لايحطني فموقفهم..ويعوض المطلقين والمطلقات بأفضل من طلاقئهم وأكيد الخيرة فيمااختاره الله |
| الساعة الآن 10:46 PM |
Powered by vBulletin® Copyright ©2000 - 2024, Jelsoft Enterprises Ltd. TranZ By
Almuhajir
هذا الموقع يستخدم منتجات Weblanca.com
adv helm by : llssll
new notificatio by 9adq_ala7sas
User Alert System provided by
Advanced User Tagging (Lite) -
vBulletin Mods & Addons Copyright © 2024 DragonByte Technologies Ltd.
بسرقتك لأفكارنا وجهد اعضاءنا أنت تثبت لنا بأننا الأفضل ..~